Душанбе, 17 июни соли 2013 – Дар давоми 3 рӯзи баргузории имтиҳонҳои Озмоиши калони низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон 1844 нафар иштирокчӣ дар 7 маркази имтиҳонӣ, ки аз тарафи Муассисаи давлатии “Маркази миллии тестӣ” дар чор минтақаи ҷумҳурӣ (шаҳрҳои Душанбе, Қӯрғонтеппа, Хоруғ, Хуҷанд) таъсис дода шудааст, дар имтиҳонҳо иштирок намуданд.

 Иштироки фаъолонаи хонандагон дар маркази имтиҳонии №1-и шаҳри Хоруғ ба қайд гирифта шудааст.

Бояд қайд намуд, ки сар карда аз 15 то 22-юми июни соли ҷорӣ дар доираи Озмоиши калони низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии Ҷумҳурии Тоҷикистон дар 7 маркази имтиҳонӣ супоридани имтиҳонҳо ҷараён дорад. Барои супоридани имтиҳонҳо 7115 нафар иштирокчиёне иҷозат дода мешаванд, ки дар давраи бақайдгирӣ (аз 15 то 30 апрели соли 2013) барои иштирок дар озмоиши мазкур аз қайд гузаштаанд. Ҳар як иштирокчӣ аз рӯйи ду компонент (компоненти А: имтиҳонҳои тести умумӣ ва хаттӣ (эссе); компоненти Б: имтиҳони тести тахассусӣ) вобаста ба кластери интихобгардида имтиҳон месупорад.

Муассисаи давлатии “Маркази миллии тестӣ” бори дигар аз хонандагони синфҳои 10-и муассисаҳои таҳсилоти миёнаи умумии ҷумҳурӣ хоҳиш менамояд, ки тибқи нишондодҳои даъватномаи дастрасгардида барои супоридани имтиҳонҳо ба марказҳои имтиҳонӣ ҳозир шаванд.