Душанбе, 17-уми апрели соли 2018
Маркази миллии тестии назди Президенти Ҷумҳурии Тоҷикистон иттилоъ медиҳад, ки дар имтиҳонҳои марказонидаи дохилшавии соли 2018 бинобар ҷой доштани баъзе мушкилоту монеаҳо барои ҷорӣ кардан ва тафтиши кори хаттӣ (эссе) он на дар доираи ҳамаи гурӯҳҳои ихтисосҳо, балки танҳо вобаста ба гурӯҳи ихтисосҳои 3-юм (филология, педагогика ва санъат) роҳандозӣ карда мешавад, яъне дар ИМД-2018 эссеро танҳо довталабоне менависанд, ки гурӯҳи ихтисосҳои 3‑юмро интихоб кардаанд.
Лозим ба қайд аст, ки тибқи тартиби муқарраршуда довталаб эссеро бо забони тоҷикӣ ё русӣ, ки онро ҳангоми бақайдгирӣ ҳамчун забони имтиҳонсупорӣ интихоб кардааст, менависад.
Вобаста ба ин, ба довталабоне, ки гурӯҳи ихтисосҳои 3‑юм (филология, педагогика ва санъат)‑ро интихоб кардаанд, тавсия медиҳем, ки бо дастуру маводе, ки оид ба навиштани эссе таҳия гардида, ба муассисаҳои таълимӣ дастрас гардонида шудааст, шинос шуда, ба имтиҳонҳо омода шаванд. Хотиррасон мекунем, ки гунаи электронии мавод оид ба навиштани эссе дар сомонаи Марказ ва Вазорати маориф ва илми Ҷумҳурии Тоҷикистон ҷой дода шудааст.
