Душанбе, 17-уми феврали соли 2022

16-уми феврал дар Маркази миллии тестии назди Президенти Ҷумҳурии Тоҷикистон нишасти матбуотӣ доир шуд.

Дар оғози нишаст директори Марказ Хуршед Икромӣ намояндагони ВАО-ро хушомадед гуфта, оид ба навгониҳо дар фаъолияти Марказ, марҳалаҳои сипаригардидаи имтиҳонҳои марказонидаи дохилшавӣ (ИМД) ва нақшаҳои оянда ба таври мухтасар иттилоъ дод.

Аз ҷумла, тазаккур дода шуд, ки шумораи умумии муассисаҳои таълимии таҳсилоти миёна ва олии касбие, ки соли 2021 қабули донишҷӯён ба онҳо ба воситаи низоми ИМД ба роҳ монда шуд, ба 103-то расид. Ин шумора 36 муассисаи таълимии таҳсилоти олии касбӣ ва 67 муассисаи таълимии таҳсилоти миёнаи касбиро дар бар мегирад, ки нисбат ба соли 2020 2-то бештар аст.

Ба гуфтаи директори Марказ, дар соли 2022 ба низоми ИМД боз 6 муассисаи таълимӣ (3 муассисаи таълимии таҳсилоти миёна ва 3 муассисаи таълимии таҳсилоти олии касбӣ) ворид гардид.

Инчунин, барои қабули донишҷӯён ба коллеҷҳо ва донишгоҳу донишкадаҳо дар заминаи таҳсилоти миёнаи умумӣ, ибтидоӣ ва миёнаи касбӣ тибқи нақша дар соли 2021-ум 86 ҳазору 307 ҷой ҷудо гардида буд, ки аз он 17 ҳазору 767 ҷой (20,59 %) барои таҳсили ройгон ва 68 ҳазору 540 ҷой (79,41 %) барои таҳсили пулакӣ пешбинӣ шудааст.

Зимни нишаст аз ҷониби намояндагони расонаҳои хабарӣ вобаста ба марҳалаҳои ИМД ва монанди инҳо савол дода шуд, ки роҳбарияти Марказ ба онҳо посухҳои дақиқ гуфт.

Дар охир директори Марказ ба намояндагони ВАО барои иштироки фаъолона дар нишаст изҳори миннатдорӣ намуда, онҳоро ба ҳамкорӣ даъват кард.