Душанбе, 2-юми апрели соли 2022
2 апрел дар Муассисаи таълимии давлатии “Мактаби байналмилалии Президентӣ” дар шаҳри Душанбе даври ҷумҳуриявии олимпиадаҳои фаннӣ барои хонандагони муассисаҳои таҳсилоти умумӣ дар соли 2022 оғоз гардид.
Дар асоси фармоиши вазири маориф ва илми Ҷумуҳурии Тоҷикистон аз 30 марти соли 2022, № 370 Муассисаи давлатии “Маркази ҷумҳуриявии дарёфт ва рушди истеъдодҳо” дар ҳамкорӣ бо Маркази миллии тестии назди Президенти Ҷумҳурии Тоҷикистон даври ҷумҳуриявии олимпиадаҳои фанниро барои хонандагони синфи 11-уми муассисаҳои таҳсилоти умумӣ аз фанҳои табиӣ-риёзӣ, аз ҷумла: физика, математика, биология, химия ва география баргузор карданд.
Дар олимпиадаҳои мазкур 536 нафар хонанда, аз ҷумла аз мактабҳои типи муқаррарӣ 296 хонанда ва аз мактабҳои типи нав (мактабҳои президентӣ, литсей ва гимназияҳо) 240 хонанда иштирок намуданд.
Лозим ба зикр аст, ки тибқи тартиби муқарраргардида ба хонандагоне, ки дар даври ҷумҳуриявии олимпиадаҳои фаннӣ ғолиб меоянд, дар доираи имтиҳонҳои марказонидаи дохилшавӣ дар сурати мувофиқати фанни олимпиада ба ихтисосҳои интихобкардааш имтиёз дода мешавад. Аз ҷумла, барои ғолибони ҷойи якум 100 бал, барои ғолибони ҷойи дуюм 75 бал ва барои ғолибони ҷойи сеюм 50 бали бонусӣ муқаррар гардидааст, ки дар имтиҳонҳои марказонидаи дохилшавӣ ба балҳои бадастовардаашон илова мегардад.
