Душанбе, 30-юми декабри соли 2024
30-юми декабри соли 2024 дар дафтари асосии Маркази миллии тестии назди Президенти Ҷумҳурии Тоҷикистон ба муносибати 30-солагии Ҳизби Халқии Демократии Тоҷикистон ҷаласаи тантанавӣ баргузор гардид.
Дар он директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ Файзалӣ, мудири шуъбаи таблиғот ва иттилооти Кумитаи иҷроияи ҲХДТ дар ноҳияи Исмоили Сомонӣ Гадоев Абдурасул ва кормандони Марказ иштирок намуданд.
Дар оғози ҷаласа директори Марказ Ҷаъфарзода Сабзалӣ Файзалӣ иброз дошт, ки Ҳизби Халқии Демократии Тоҷикистон аз рӯзҳои аввали таъсис ҳимояи манфиатҳои халқро ҳадафи асосӣ қарор дода, барои зиндагии босаодати миллат саъю талош менамояд.
Гадоев Абдурасул таъкид намуд, ки аз таърихи давлати Тоҷикистон ва раванди бунёди давлати миллӣ шоҳиди он ҳастем, ки аз рӯзҳои аввали соҳибистиқлолӣ гурӯҳҳои сиёсии зиёд таъсис дода шуданд. Онҳо барои ба даст овардани ҳокимият, новобаста аз надоштани нуфузи ҷамъиятӣ ва таҷрибаи кофӣ, вориди муборизаҳои сиёсӣ гардиданд, ки натиҷаи он ба низои сиёсӣ оварда расонд. Дар натиҷаи бархӯрдҳои сахти сиёсӣ аксарияти онҳо зуд аз саҳнаи сиёсӣ нопадид гардиданд.
Роҳи паймудаи Ҳизби Халқии Демократии Тоҷикистон ҳамвор набуд. Маҳз бо роҳнамоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон он ба ҳизби мардумӣ, неруи муқтадир ва мафкурасоз мубаддал шуд.
Дар охири ҷаласа 6 нафар аз ҷумлаи кормандони ҳайати асосии Марказ бо ифтихорномаву сипосномаҳои Кумитаи иҷроияи ҲХДТ дар ноҳияи Исмоили Сомонӣ қадргузорӣ карда шуданд.
