Душанбе, 11-уми апрели соли 2025
Таҳқиқоти (асосии) Барномаи байналмилалии арзёбии хонандагон – PISA 2025 (Programme for International Student Assessment) , ки аз 2-юми апрели соли 2025 оғоз гардида буд, имрӯз дар муассисаҳои таълимии таҳсилоти миёнаи умумии № 15-и ноҳияи Синои шаҳри Душанбе, № 44-и ноҳияи И. Сомонии шаҳри Душанбе, № 10-и ноҳияи И. Сомонии шаҳри Душанбе, муассисаи давлатии таҳсилоти миёнаи умумии мактаб – интернати № 1 барои кӯдакони ятим ва бепарастори шаҳри Душанбе, гимназияи № 4 барои хонандагони болаёқати шаҳри Душанбе, литсейи №1 барои хонандагони болаёқати шаҳри Душанбе, литсейи хусусии "Эҳсон" ва Коллеҷи муҳандисию омӯзгории шаҳри Душанбе доир гардид.
Рафти таҳқиқоти Барномаи байналмилалии PISA-ро, ки дар муассисаи таълимии таҳсилоти миёнаи умумии № 15-и ноҳияи Синои шаҳри Душанбе ҷараён дошт, муовини вазири маориф ва илми Ҷумҳурии Тоҷикистон Каримзода Равшан Азам, директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ, коршиноси Лоиҳаи Иттиҳоди Аврупо оид ба таҳсилоти миёнаи умумӣ Айгул Казжанова ва дигар масъулон назорат карданд.
Мувофиқи нақша ин таҳқиқот то 25-уми апрели соли равон дар 160 муассисаи таълимии таҳсилоти умумӣ, ибтидоӣ ва миёнаи касбии шаҳри Душанбе бо иштироки 6257 таълимгирандаи ин муассисаҳои таълимӣ гузаронида мешавад.
PISA таҳқиқоти байналмилалии муқоисавии сифати таҳсилоти умумӣ буда, дар доираи он дониш ва малакаю маҳоратҳои хонандагони 15-солаи муассисаҳои таълимии кишварҳои гуногун дар се бахш – саводи хондан, саводи математикӣ ва саводи илмҳои табиатшиносӣ (физика, химия ва биология) арзёбӣ карда мешавад.
Мақсади асосии таҳқиқот арзёбии саводи амалкардӣ (функсионалӣ)-и мактаббачагон ва қобилияти дар амал истифода намудани дониш аст. Таҳқиқот даврӣ буда, ҳар чор сол як маротиба аз тарафи Созмони ҳамкории иқтисодӣ ва рушд (СҲИР) баргузор мегардад. Таҳқиқоти мазкур дар Ҷумҳурии Тоҷикистон бо дастгирии молиявии Иттиҳоди Аврупо амалӣ карда мешавад.
Тазаккур бояд дод, ки мувофиқи созишномае, ки Вазорати маориф ва илми Ҷумҳурии Тоҷикистон бо Созмони ҳамкории иқтисодӣ ва рушд ба имзо расонидааст, Ҷумҳурии Тоҷикистон бори аввал дар Барномаи байналмилалии арзёбии хонандагон (PISA) иштирок мекунад.
