Душанбе, 18-уми майи соли 2025
Бо мақсади иҷрои фармони Президенти Ҷумҳурии Тоҷикистон аз 28-уми марти соли 2007, № 225 ҳамасола дар тамоми гӯшаву канори ҷумҳурӣ бо иштироки сокинони мамлакат, намояндагони касбу кори гуногун, вазорату кумитаҳо, корхонаю муассиса ва ташкилоту идораҳо дави миллӣ ва марафони велосипедронӣ ба муносибати Рӯзи ҷавонон баргузор мегардад.
Дави миллӣ дар шаҳри Душанбе тавассути кӯчаҳои Карамов — хиёбони Ҳофизи Шерозӣ то муассисаи давлатии «Наврӯзгоҳ» баргузор гардид. Дар дави миллӣ 30 ҳазор нафар ва дар марафони велосипедронӣ 380 нафар иштирок намуданд.
Дар қатори дигар сокинон ва кормандони идораву корхонаҳо роҳбарият ва кормандони Маркази миллии тестии назди Президенти Ҷумҳурии Тоҷикистон дар ин барномаи варзишӣ – дави миллӣ ва марафони велосипедронӣ ширкат варзиданд.
Мақсад аз баргузории чунин мусобиқаҳои варзишӣ таҳкими тарзи ҳаёти солим, рушди соҳаи варзиш ва тавсиаи он дар байни аҳолӣ мебошад. Варзиш яке аз василаҳои муҳимми тарбияи ҷисмонӣ ва маънавӣ буда, дар ташаккули ҷомеаи солим нақши муассир дорад.
Чунин чорабиниҳои оммавӣ воситаи сарҷамъии миллат, дӯстиву рафоқат ва ташвиқи тарзи ҳаёти солим мебошад. Имрӯзҳо ба шарофати истиқлоли давлатӣ соҳаи варзиш дар мамлакат рушд намуда, варзишгарони тоҷик дар арсаи байналмилалӣ сазоворӣ ҷойҳои ифтихорӣ мегарданд.
