Душанбе, 27-уми январи соли 2021

Раёсату шуъбаҳои маорифи шаҳру ноҳияҳои ҷумҳурӣ дар ҳамкорӣ бо Маркази миллии тестии назди Президенти Ҷумҳурии Тоҷикистон (Марказ) тибқи фармоиши Вазорати маориф ва илми Ҷумҳурии Тоҷикистон бо мақсади иҷрои  банди 59-уми “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”, ки бо қарори Ҳукумати Ҷумҳурии Тоҷикистон аз 1-уми марти соли 2018, № 81 тасдиқ шудааст, курси шиносоиро бо низоми имтиҳонҳои мазкур барои омӯзгорони муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбӣ аз 27-уми январи соли 2021 оғоз карданд.

Тавре ки қаблан иттилоъ дода будем, тибқи тартиби муқарраркардаи Ҳукумати Ҷумҳурии Тоҷикистон курси шиносоӣ бо низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар се сатҳ (давр): ҷумҳуриявӣ, шаҳрию ноҳиявӣ ва муассисаҳои таълимӣ ташкилу баргузор мегардад.

Ҳадаф аз баргузории даври дуюми курс омода кардани омӯзгорони муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбӣ ҷиҳати гузаронидани ин курс (даври сеюм) барои хатмкунандагон дар муассисаҳои таълимии зикргардида аст.

Курси шиносоӣ бо низоми ИМД, ки барои омӯзгорони муассисаҳои таълимӣ то 29-уми январ идома меёбад, дар ҳамаи 68 шаҳру ноҳияҳои ҷумҳурӣ баргузор мегардад. Барои ифтитоҳи курси мазкур кормандони Марказ ба 33 шаҳру ноҳия равона гардидаанд.

Хотиррасон мекунем, ки курси мазкур дар доираи барнома ва модули омӯзишӣ ва дастури иттилоотию методии “Роҳнамои довталаб” роҷеъ ба хусусияти низоми ИМД ва талаботу қоидаҳои муқарраршудаи марбут ба он, хусусан барои бақайдгирии довталабон ва мавзӯъҳои дигари дахлдор, сурат мегирад. Ҳайати кории Марказ барои шарҳу тафсили мавзӯъҳои дарсӣ шаклҳои гуногуни таълими интерактивӣ, аз ҷумла муаррифии компютерӣ, маърӯзаҳои хурд, маводди чопию электронии барои тқсимот муқарраршуда ва ғайраро омода намудааст.