Душанбе, 16‐уми феврали соли 2021
Санаи 15-уми феврали соли ҷорӣ дар бинои бахши минтақавии раёсати ташкил ва идораи имтиҳони Маркази миллии тестии назди Президенти Ҷумҳурии Тоҷикистон дар шаҳри Хуҷанд семинари омӯзишӣ барои кормандони муваққатии нуқтаҳои бақайдгирии шаҳру ноҳияҳои вилояти Суғд оғоз гардид.
Мақсад аз баргузории чорабинии мазкур омӯзиш ва интихоби кормандони муваққатӣ дар вазифаҳои роҳбар, ёвар ва бақайдгирандагони нуқтаҳои бақайдгирӣ ва дар сатҳи зарурӣ ба роҳ мондани раванди асосии бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таҳсилоти миёна ва олии касбии Ҷумҳурии Тоҷикистон дар соли 2021 мебошад.
Бояд қайд кард, ки семинари омӯзишии кормандони нуқтаҳои бақайдгирӣ тибқи барнома ва модули тасдиқгардида баргузор гашта, дар асоси озмун беҳтаринҳо интихоб ва ба кори муваққатӣ ҷалб карда мешаванд.
Маврид ба зикр аст, ки барои иштирок дар озмуни интихоби кормандони муваққатӣ дар марҳалаи бақайдгирӣ 174 нафар хоҳишманд ҳуҷҷат пешниҳод кардаанд, ки аз ин шумора вобаста ба таҳлил ва санҷишҳои пешакӣ 138 нафар барои иштирок дар семинари мазкур роҳ ёфтанд.
Пас аз баргузории семинарҳо ва озмун 56 нафар ба кори муваққатӣ ҷалб шуда, фаъолияти бақайдгирандагони интихобшуда аз 1-уми марти соли ҷорӣ шурӯъ мегардад.
Бояд тазаккур дод, ки дар соли ҷорӣ дар 11 шаҳру ноҳияи вилоят нуқтаҳои бақайдгирии доимамалкунанда бо теъдоди 34 адад истгоҳи корӣ таъсис дода мешавад.
