13-юми октябри соли 2016

Тибқи нақшаи кории Маркази миллии тестии назди Президенти Ҷумҳурии Тоҷикистон аз 6-уми октябри соли ҷорӣ дар 199 муассисаи таҳсилоти миёнаи умумии 7 шаҳру ноҳияи кишвар (шаҳрҳои Душанбе, Қӯрғонтеппа, Хуҷанд ва Хоруғ) вохӯриҳо бо хатмкунандагони соли 2017 шурӯъ гардид.

Дар чаҳорчӯбаи корҳои иттилоърасонию таблиғотӣ дар назар аст, ки вохӯриҳои мазкур барои 16 ҳазору 938 хатмкунанда баргузор шавад.

Маркази милии тестӣ 12 нафар корманди масъулашро вазифадор кард, ки дар давоми моҳҳои октябр ва ноябр бо 670 омӯзгори муассисаҳои таълимӣ вохӯрӣ баргузор намуда, зимни он дар бораи низоми имтиҳонҳои марказонидаи дохилшавӣ, аз ҷумла, дар бораи аҳамияти баланд доштани тарзи дурусти интихоби комбинатсияи ихтисосҳо ва бартарии онҳо дар марҳалаи омодагӣ ба имтиҳонҳо муаррифӣ (презентатсия)-и компютерӣ пешниҳод гардонанд.

Лозим ба қайд аст, ки презентатсияи компютерӣ барои хатмкунандагон бо таҳлилҳо ва натиҷагириҳо аз имтиҳонҳои солҳои қаблӣ пешниҳод мегардад.

Дар назар аст, ки барои дигар шаҳру ноҳияҳои ҷумҳурӣ дар моҳи декабр низ чунин вохӯриҳо ташкил карда шаванд.