Душанбе, 10-уми феврали соли 2020
Маркази миллии тестии назди Президенти Ҷумҳурии Тоҷикистон бо мақсади омӯзиш ва интихоби роҳбарону ёварони онҳо ва бақайдгирандагони нуқтаҳои бақайдгирӣ ва дар сатҳи зарурӣ ба роҳ мондани раванди бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2020 аз 10-уми феврали соли ҷорӣ семинарҳои омӯзиширо барои кормандони нуқтаҳои бақайдгирӣ оғоз менамояд.
Мувофиқи нақша дар низоми имтиҳонҳои марказонидаи дохилшавӣ-2020 дар 33 шаҳру ноҳияи ҷумҳурӣ 38 нуқтаи доимии бақайдгирӣ бо теъдоди 144 истгоҳи корӣ ва дар 26 шаҳру ноҳияи дигар нуқтаҳои сайёри бақайдгирӣ таъсис дода мешавад.
Тибқи эълон бо тариқи электронӣ 396 нафар хоҳишманд бо мақсади иштирок дар озмун барои интихоби кормандони муваққатии нуқтаҳои бақайдгирӣ ариза (бо ҳуҷҷатҳои дигари зарурӣ) пешниҳод намуданд. Аз ин шумора, мувофиқи таҳлилу баррасии ҳуҷҷатҳои пешниҳодкарда, 371 нафар шахси аризадода ба семинарҳои омӯзишӣ ҷалб карда мешаванд.
Барои ташкилу баргузории семинарҳои омӯзишӣ дар шаҳру ноҳияҳои Душанбе, Хуҷанд, Панҷакент, Бохтар, Кӯлоб, Хоруғ, Рашт ва Данғара аз ҷумлаи кормандони Марказ гурӯҳҳои корӣ таъсис дода шудааст. Тибқи барнома семинарҳои омӯзишӣ барои 15 гурӯҳ дар шаҳру ноҳияҳои зикршуда то 22-юми феврал давом меёбад.
Дар асоси озмун шахсони ба талабот ҷавобгӯй ва дорои донишу маҳорати арзанда барои кор дар нуқтаҳои бақайдгирӣ интихоб карда мешаванд.
Бояд қайд кард, ки бақайдгирии довталабон 1-уми марти соли 2020 дар Ҷумҳурии Тоҷикистон оғоз меёбад.
