Душанбе, 5-уми октябри соли 2022
5-уми октябри соли 2022 ба муносибати Рӯзи забони давлатии Ҷумҳурии Тоҷикистон дар толори дафтари асосии Маркази миллии тестии назди Президенти Ҷумҳурии Тоҷикистон ҷаласа баргузор гардид. Дар он роҳбарияти Марказ бо кормандони дафтари асосии муассиса иштирок карданд.
Ҷаласаро директори Марказ Ҷаъфарзода Сабзалӣ Файзалӣ кушода, ҳозиринро ба муносибати Рӯзи забони давлатии Ҷумҳурии Тоҷикистон таҳният ва пиромуни ҷашни мазкур мухтасар сухан гуфт.
Ӯ, аз ҷумла, қайд кард, ки дар даврони истиқлоли кишвар таҳти сиёсати ватандӯстонаю миллатпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пойгоҳу манзалати забони тоҷикӣ баландтар гардид. Нақш ва ҷойгоҳи Президенти Ҷумҳурии Тоҷикистон муҳтарам Эмомалӣ Раҳмон дар таҳкими забони тоҷикӣ, ҳамчун забони давлатӣ, воқеан, арзандаи ситоиш аст.
Қабули санаду барномаҳо, аз ҷумла “Барномаи рушди забони давлатии Ҷумҳурии Тоҷикистон барои солҳои 2012-2016”, таҳким ёфтани меъёрҳои забони адабии тоҷикӣ, таълифи асарҳои зиёди илмии соҳавӣ дар ташвиқу таблиғи худшиносии миллӣ, афзудани нуфузи байналмилалии забони тоҷикӣ аз ҷумлаи хидматҳои шоён ва хоси Президенти Ҷумҳурии Тоҷикистон дар ин самт ба шумор меравад, - қайд кард Ҷаъфарзода С. Ф..
Мазкур таъкид кард, ки ҳифзу арҷгузории забони давлатӣ – забони тоҷикӣ – ин сарвати беназири миллат, донистану риоя кардани “Қоидаҳои имлои забони тоҷикӣ” ва роҳнамоии дигарон дар ин самт, тарбияи фарзандон дар руҳияи забондӯстӣ барои ҳар яки мо, хусусан ба кормандони мақомоти давлатӣ хеле зарур мебошад.
Сипас сармутахассиси фанни таърихи Марказ Абдуллоев Раҳматулло оид ба Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” ва таърихи қабули он, мубориза ва талошҳои фарзандони миллат барои баланд бардоштани ҷойгоҳи забони тоҷикӣ суханронӣ кард.
Ҳамчунин, кормандони Марказ Азимов Ҷамшед ва Фазлиддинзода Абдулбосит низ ба сухан баромада, роҷеъ ба забони тоҷикии форсӣ, бузургдошти он, мавқеъ ва манзалати имрӯзаи забон дар ҷомеа ва давлату давлатдорӣ ва амсоли инҳо ибрози назар карданд.
