Душанбе, 12-уми апрели соли 2018

Ба диққати довталабоне, ки мехоҳанд дар донишгоҳҳои олӣ аз рӯйи низоми фосилавӣ таҳсил кунанд, мерасонем, ки бо қарори мушовараи Вазорати маориф ва илми Ҷумҳурии Тоҷикистон аз 29-уми майи соли 2017, №7/35 “Низомномаи таҳсилоти фосилавӣ дар муассисаҳои таҳсилоти олии касбии Ҷумҳурии Тоҷикистон” тасдиқ гардидааст. Маълумоти муфассалро дар бораи раванди таълим тибқи таҳсили фосилавӣ аз низомномаи мазкур дастрас кардан мумкин аст.

Лозим ба қайд аст, ки вобаста аз муомилаи ба низом даровардашудаи таълимдиҳанда (омӯзгор) ва таълимгиранда (донишҷӯй) дар муассисаҳои таълимии таҳсилоти миёна ва олии касбӣ шаклҳои зерини таҳсил пешбинӣ гардидааст:

– рӯзона – шакли маъмултарини гирифтани маълумоти касбӣ, ки донишҷӯй дар он ҳар рӯз (ба ғайри рӯзҳои истироҳат) дар давоми нимсола (семестр)-ҳо дар лексияву семинарҳо иштирок карда, сипас имтиҳонҳои дахлдорро месупорад.

– шабона – таҳсил дар нимаи дуюми рӯз. Ин шакли таҳсил ба таҳсили рӯзона хеле наздик буда, ба коллеҷҳои тиббӣ хос аст.

– ғоибона – шакли нисбатан мустақилонаи таҳсил, ки дар он донишҷӯй дар муҳлати муайян ба муассисаи таълимӣ ҳозир шуда, вазифаҳояшро мегирад, бо рӯйхати адабиёт шинос мешавад, ҳаҷми зиёди корҳо (маводи дарсӣ)-ро мустақилона анҷом медиҳад ва сипас санҷишу имтиҳонҳоро месупорад.

– фосилавӣ – яке аз шаклҳои таҳсили ғоибона, ки дар он донишҷӯй бо омӯзгор дар фосилаи аз якдигар дур ба воситаи хизматрасониҳои шабакаи Интернет: низомҳои махсуси таҳсили фосилавӣ, почтаи электронӣ, гуфтугӯйҳо (чатҳо), видео-конфронсҳо ва ғайра муомила мекунад.

Амалӣ гардонидани низоми таҳсилоти фосилавӣ қонеъ намудани талабот ва ҳуқуқи шаҳрвандон ба таҳсилот мебошад. Аз ҳисоби ташкили васоити зудамали таълимӣ ва имконияти новобаста аз макони воқеъ будани донишҷӯ ва омӯзгор, тавассути технологияҳои иттилоотию коммуникатсионӣ ташкил намудани раванди омӯзиш, бо нигоҳдории сифати он, сатҳи нави дастрас будани таълимро таъмин менамояд.

Таълим бо истифодаи технологияи иттилоотию коммуникатсионӣ мувофиқи талаботи нақшаю барномаҳои таълимӣ, ки онро Вазорати маориф ва илми Ҷумҳурии Тоҷикистон тасдиқ менамояд, ба роҳ монда мешавад.

Технологияи таҳсилоти фосилавӣ ва дастрас гардонидани манбаъҳои иттилоотии электронӣ бо истифодаи технологияҳои ҳозиразамони иттилоотию коммуникатсионӣ ва моҳворавӣ амалӣ гардонида мешавад.

Ташкили ҷараёни таълим бо истифодаи усулҳои навтарини тайёр кардани мутахассисони дорои маълумоти олии гуманитарӣ ва техникӣ, аз ҷумла, дар ихтисосҳои информатика ва техникаи ҳисоббарор, менеҷмент, ҳуқуқ, иқтисод, ки дар дохил ва хориҷи кишвар тайёр карда мешаванд, мусоидат менамояд.

Барои гирифтани маълумоти муфассал метавонед, ба Вазорати маориф ва илми Ҷумҳурии Тоҷикистон муроҷиат намоед.

Телефонҳо барои тамос:

(37) 223-13-95;

(37) 221-67-13;

(37) 227-45-81.