Душанбе, 12‐уми феврали соли 2021
Дар толори компютерии Маркази технологияҳои иттилоотию коммуникатсионии назди Сарраёсати маорифи шаҳри Душанбе нуқтаи истифода аз хизматрасонии "Худро бисанҷ" таъсис дода шуд.
Хизматрасонии "Худро бисанҷ" дар заминаи сомонаи Маркази миллии тестии назди Президенти Ҷумҳурии Тоҷикистон ба таври мустақим дастрас аст, ки аз он хоҳишмандон метавонанд озода истифода баранд ва бо супоридани тест аз фанҳои гуногуни дохилшаванда аз низоми имтиҳонҳои марказонидаи дохилшавӣ сатҳи дониши худро санҷида, ҳамзамон ба имтиҳонҳои воқеӣ омода гарданд. Барои истифода аз ин хизматрасонӣ мавҷудияти алоқаи интернетӣ зарур аст.
Варианти дигари хизматрасонии "Худро бисанҷ", ки барои ин толор таҳия гардидааст, бо мақсади истифода бурдани он дар доираи шабакаи компютерии маҳаллӣ (локалӣ) равона гардидааст. Яъне, дар ин ҳолат мавҷудияти алоқаи интернетӣ шарт нест. Хонандагони муассисаҳои таълимии пойтахт метавонанд, ки дастаҷамъона ва ё ба таври инфиродӣ ба толори мазкур омода бо номнавис шуданашон дар низом аз хизматрасонии "Худро бисанҷ" баҳра бардоранд.
Яке аз мақсадҳои асосии таъсиси ин гуна толор таъмин кардани шароит ва имконияти мувофиқ барои хонандагони муассисаҳои таълимии пойтахт ҷиҳати боз ҳам хубтар омода шуданашон ба имтиҳонҳои марказонидаи дохилшавӣ ба ҳисоб меравад.
